დღეს, 17 დეკემბერს, ირაკლი კობახიძეს მთავრობის ადმინისტრაციაში გამართულ პრესკონფერენციაზე ტელეკომპანია „იმედის“ ჟურნალისტმა დაუსვა შეკითხვა მედია პლატფორმა Chai Khana-ს და USAID-ის სამოქალაქო საზოგადოების ჩართულობის პროგრამის თანამშრომლობის შესახებ.

ხელისუფლების მხარდამჭერ სატელევიზიო და ონლაინ მედიებში ამ ამბის შესახებ გავრცელდა არასწორი ინფორმაცია. გვსურს, განვმარტოთ, რომ Chai Khana-ს და USAID-ის სამოქალაქო საზოგადოების ჩართულობის პროგრამას შორის თანამშრომლობის შესახებ შეთანხმება მეორე წელია არსებობს და ეს თანამშრომლობა მიზნად ისახავს აქტიური სამოქალაქო ინიციატივების და იმ პოზიტიური ცვლილებების წარმოჩენას, რომელიც ამ ინიციატივების შედეგია. 

ვინაიდან ქვეყანა მოცულია უწყვეტი საპროტესტო აქციებით, რომელიც დღეს ნებისმიერი მედიის გაშუქების პრიორიტეტია, Chai Khana-ც ამ დრომდე აშუქებს მიმდინარე აქციებს ჩვენთვის დამახასიათებელ ფორმატში, რაც გულისხმობს შემოქმედებითი დოკუმენტური ფილმებისა და ფოტო პროექტების მომზადებას დამოუკიდებელი ავტორების მიერ.

ასევე, მედია პლატფორმის გარდა, Chai Khana ფუნქციონირებს როგორც საპროდიუსერო კომპანია, რომელიც მომსახურების ხელშეკრულების ფარგლებში თანამშრომლობს იმ ორგანიზაციებთან, რომლებიც თანხვედრაშია Chai Khana-ს ღირებულებებთან. ამ მომსახურების შეთანხმების ფარგლებში შექმნილი ვიდეოების გამოქვეყნების ვალდებულება Chai Khana-ს საკუთარ პლატფორმებზე არ აქვს.

ტელეკომპანია „იმედის“ მიერ გავრცელებული ინფორმაციით, Chai Khana-მ უარი განაცხადა პროტესტთან დაკავშირებული ვიდეოების გამოქვეყნებაზე, რაც სიმართლეს არ შეესაბამება. ასეთი ვიდეოების სერია არ მომზადებულა, რადგან ფორმატზე პარტნიორ ორგანიზაციასთან საბოლოოდ შეთანხმებულები ჯერ არ ვიყავით. ასევე, გვსურს, ცალსახად განვაცხადოთ, რომ Chai Khana ამაყობს საერთაშორისო ორგანიზაციებთან წარსული, მიმდინარე და მომავალი თანამშრომლობებით. 

აქვე განვმარტავთ, რომ Chai Khana-ს და USAID-ის სამოქალაქო საზოგადოების ჩართულობის პროგრამის თანამშრომლობის ფარგლებში დაგეგმილი ვიდეოების შესახებ არ ყოფილა საჯარო კომუნიკაცია არცერთი ჩართული მხარის მხრიდან. ტელეკომპანია „იმედის“ მიერ ირაკლი კობახიძისთვის დასმული შეკითხვა გვაძლევს საფუძველს ვიფიქროთ, რომ ეს ინფორმაცია მოპოვებულია, სავარაუდოდ, უკანონო მიყურადების ფარგლებში, რომელიც ასევე უკანონოდ მიაწოდეს ტელეკომპანია „იმედს“.

ირაკლი კობახიძემ შეკითხვაზე პასუხად ახსენა „რუსული კანონის“ სახელით ცნობილი 2024 წლის მაისში მიღებული კანონი „უცხოური გავლენის გამჭვირვალობის შესახებ.” დღევანდელი მოვლენები ადასტურებს დამოუკიდებელი მედიისთვის მუშაობაში ხელის შეშლის განზრახვას და აღნიშნული კანონის მედიის დისკრედიტაციის მიზნით გამოყენების მცდელობას.