Chai Khana Photo Book
Chai Khana Photo Book

Շոկոլադե տորթի մի պատմություն. համաճարակից մինչև հաջողություն.

Հեղինակ՝: Բիայնա Մահարի

23.07.20
Հրատարակություն: Անցում
թեման: Կանայք

Գիշերը ժամը մեկն էր, երբ հայ արվեստագետ, այլևս արդեն խմորեղենների մասնագետ Նանա Մանուչարյանն ինձ խնդրեց մեր հանդիպումն առավոտյան 9:00-ից տեղափոխել 8:30:

Յոթ ժամ անց ես սպասում էի նրա բնակարանի մոտ, մտածելով, որ դռան անպատասխան թակոցներս նշանակում են, որ նա դեռ քնած է: Կարծում եմ զարմանալի չէր լինի, եթե այդպես լիներ, չէ որ 29-ամյա Նանան համաճարակի ընթացքում երկու բիզնես էր վարում և որպես միայնակ ծնող որդուն մեծացնում:

Քանի դեռ ես մտածում էի այդքան վաղ ժամին զանգահարել նրան ու հիշեցնել որ հանդիպում ունենք թե ոչ, 29-ամյա Նանան դուրս եկավ անկյունից՝ զինված սուպերմարկետից գնված մթերքով լի պայուսակներով, վաղուց սկսած օրվա անցուդարձով:

Ամբողջ օրվա ընթացքում ես մտովի վերադառնում էի այս դրվագին, որը նկարագրում է Նանային՝ մի արվեստագետի, ով ոգեշնչում է գտել «Covid -19»-ի համաճարակի ընթացքում և կարողացել ճգնաժամը վերածել ստեղծագործական նոր բիզնեսի:

Նույնիսկ նոր բիզնեսի գաղափարները Նանայի մոտ հապճեպ են հայտնվում: Պանդեմիայի առաջին շաբաթների ընթացքում նա մտածում էր, թե ինչպես է շարունակելու վճարել իր աշխատակիցներին և Terracotta-ի չորս արվեստանոց-ստուդիաների վարձավճարը, որոնք ստիպված էր ժամանակավորապես փակել: Համաճարակի հայտարարումից հետո նրա կազմակերպած առցանց դասընթացները փոքր եկամուտ էին բերում, որը բավարար չէր՝ բոլոր ծախսերը հոգալու համար: Նանայի որդին՝ Արգիշտին, նրան անընդհատ խնդրում էր Նուտելա գնել: Խանութում վաճառվող տարբերակը գնելու փոխարեն Նանան որոշեց փարձել այն պատրաստել տանը: Շոկոլադե կրեմը շատ համեղ ստացվեց, իսկ տորթ պատրաստելու փորձն էլ ավելի մեծ հաջողությամբ պասկվեց: Նրա չորս քույրերն անմիջապես օգնեցին նախագծել Arty Choc Bakery-ի լոգոն, և նա սկսեց այն առցանց գովազդել: Այդ օրը կիրակի էր: Արդեն երկուշաբթի բիզնեսը ծնվեց` Նանան երկու տորթի պատվեր ուներ:

8:48 Այս օրերին Նանան արթնանում է արևից առաջ, որպեսզի թխի օրեցօր ավելացող հաճախորդների համար: Արտի Չոքը օրական միջինում տասը պատվեր է ունենում, որոնք Նանան պատրաստում է՝ շարունակելով իր արվեստանոց-ստուդիաների գործունեությունը:
8:57 Դեռ առավոտյան ժամը 9-ը չկա, իսկ Նանան արդեն զարդարում է իր շոկոլադե ստեղծագործությունները: Նա հաճախ 6-ին է արթնանում, որպեսզի մեծածախ շուկայից կարողանա թարմ մրգեր գնել:
9:03 Նանայի ընկերներն օգնել են նրան վերանորոգել և ձևավորել բնակարանը: Պատերը ներկել են նրա սիրած գույնով և զարդարել իր իսկ պատրաստած ափսեներով: Արտի Չոքից առաջ տասը տարի Նանան զբաղվել է արվեստի և կերամիկայի ստուդիան՝ Terracotta- ն ոտքի կանգնեցնելով: Ստուդիան առաջարկում է մի շարք դասընթացներ՝ ներառյալ երեխաների ամառային դպրոցը:
9:18 Սկզբում Նանան «տորթի գործը» մենակ էր անում, բայց այժմ նրան երկու կին է օգնում: Սվետան առավոտյան արդեն այստեղ է՝ օգնելու թխելու տորթի շերտերը, որպեսզի Նանան առաքման համար կարողանա փաթեթավորել պատրաստի տորթերը և ուղևորվել ստուդիա՝ բացելու ամառային դպրոցը: Անկախ նրանից, թե որքան զբաղված է, Նանան միշտ մի քանի րոպե գտնում է մազերն ուղղելու, մի փոքր դիմահարդարվելու, զարդեր և կարմիր մազակալ դնելու համար, որպեսզի օրն ավելի պայծառ լինի:
9:25 Ճանապարհին Նանան ստիպված է կանգ առնել մեկ այլ սուպերմարկետի մոտ`ևս մի քանի բան գնելու, այս անգամ` ամառային դպրոցի համար: Այսօր դպրոցում նոր երեխաներ են լինելու. Նանան միշտ փորձում է այնտեղ լինել, որպեսզի առաջին օրը դիմավորի նոր աշակերտներին: Այս տարի ամառային դպրոցի տասներորդ տարին է. անցած տարին չտեսնված հաջող էր, և նա մեծ ակնկալիքներ ուներ նաև այս տարվա համար, բայց համաճարակն այլ ծրագրեր ուներ:
9:43 Նանան եկել է Երևանի երեք Terracotta արվեստանոցներից մեկը: Չորրորդը՝ Հայաստանի հյուսիսում գտնվող Վանաձոր քաղաքում է: Արտի Չոքն օգնեց կարանտինի ժամանակ վճարել բոլորի վարձակալության գումարը, երբ Նանան ստիպված էր ժամանակավորապես փակել դրանք: Նրա որդին՝ Արգիշտին, արդեն արվեստանոցում է և պատրաստ է օգնել: Ընտանեկան կատուն ՝ Պորշեն (այդպես Արգիշտին է նրան կոչել), ևս այստեղ է: Նա նույնպես տեղափոխվել է բնակարանից՝ տեղը զիջելով Արտի Չոքին:
9:46 Ամեն օր առավոտյան Նանան ժամանակ է գտնում մաքրելու այն բնակելի շենքի բակը, որտեղ գտնվում է նրա ստուդիաներից մեկը:
10:12 Նոր երեխաներին և նրանց ծնողներին ստուդիայում ողջունելուց հետո Նանան կրկին դուրս է գալիս՝ տորթերի առաքման համար: Որոշ տորթեր Արտի Չոքի առաքիչն է տանում կամ դրանք ուղարկվում են տաքսիով, սակայն օրվա ընթացքում Նանան հաճախ մի քանի տորթ ինքն է առաքում:
10: 37 Տորթերի համար վազքից հետո Նանան վերադառնում է ստուդիա՝ ստուգելու դասերի ընթացքը: Երբ նա դաս չի անցկացնում, սիրում է հետեւել, թե ինչպես է ընթանում օրը և անհրաժեշտության դեպքում օգնել: Այսօր այստեղ ինը երեխա է, Նանան նշում է որ համաճարակի սկսվելուց ի վեր ամենամեծ քանակն է: Նրա խոսքով, ինչպես երեխաները, այնպես էլ նրանց ծնողները պահանջ ունեն տնից դուրս ժամանակ անցկացնել՝ շաբաթներ շարունակ փակված մնալուց հետո:
11:21 Գործը սկսելուց երկու ամիս անց՝ Նանան դեռևս զարգացնում է տորթերի պատվերներն ընդունելու ձևը, և կառավարում հաղորդագրությունները Արտի Չոքի սոցիալական հաշիվներում: Այժմ նա ինքն է հոգ տանում բոլոր հաղորդակցությունների մասին՝ ձեռքով գրելով պատվերները և առաքման հրահանգները: Երբ հարցնում եմ, թե ինչու չի օգտագործում հեռախոսային ծրագրերը, ծիծաղում է: «Պատկերացնու՞մ ես, թե որքան ժամանակ կպահանջվի ծրագիրը բացելու, ամեն ինչ գրելու և փակելու համար: Ես իսկապես այդքան ժամանակ չունեմ»:
12:16 Նանան տորթեր է առաքում մոտակա սուպերմարկետ՝ օգտագործելով փայտե տուփը, որը հատուկ պատվիրել է չորս տորթ տեղավորելու համար:
12:21 Արտի Չոքի տորթերն արդեն վաճառվում են Երևանի հինգ սուպերմարկետներում, ինչը նշանակում է, որ Նանան պետք է երկու-երեք օրը մեկ անձամբ այցելի բոլոր վայրեր՝ տեսնելու, թե արդյոք տորթերը պետք է փոխարինել նորերով:
3:50 Տորթերի հետ կապված որոշ գործեր կարգի բերելուց հետո Նանան ուղևորվում է Սարյան փողոցում գտնվող Terracotta ստուդիա: Սա առաջին ստուդիան էր, որը նա բացեց 10 տարի առաջ: Առաջին Terracotta-ն միայն կերամիկական և նկարչական ստուդիա էր, բայց այժմ այն նաև առաջարկում է կարի, հագուստի ձևավորման դասեր և շատ ավելին:
4:39 Նանան 13 տարեկանից աշխատում է կավի հետ: 17 տարեկանում նա արդեն դասավանդում էր, իսկ երկու տարի անց սկսեց Terracotta-ն: Այսօր Տեռակոտան խեգեցգործությունից և մյուս դասերից բացի ներառում է նաև թերապևտիկ դասընթացներ: Չնայած համաճարակին և ֆինանսական ճգնաժամին, Նանան դեռ պլանավորում է ընդլայնել գործունեությունը. նա արդեն վերանորոգել է մի ավտոբուս, որն իր աշխատանքների համար խանութ է դարձնելու:
5:21 Ստուդիայում Նանան ուսանողներին իր տորթերից մեկն է հյուրասիրում. հազվագյուտ մի պահ, երբ նրա երկու աշխարհները միաձուլվում են:
5:27 Կարճատև քաղցր դադարից հետո Նանան վերադառնում է աշխատանքին: Իր երկու բիզնեսների սոցիալական մեդիա մարկետինգով էլ նա է զբաղվում: «Չկա մեկն, ով կարող է դա անել, ինչպես ես եմ անում, քանի որ դրանք իմ ապրանքանիշերն են, և ես դրանց համար հոգ եմ տանում»: Նանան նաև օգտագործում էր ֆոտո/վիդեոնկարահանման իր գիտելիքները` կարանտինի ընթացքում առցանց վարպետության դասընթացներ կազմակերպելու համար:
6:38 Նանան դեռ նոր էր եկել ստուդիա, երբ տորթի մի հրատապ պատվեր ստացավ: «Կարո՞ղ եք հենց հիմա մեզ տորթ ուղարկել»: Թողնելով կերամիկայի դասը պատասխանատու աշխատակցի վրա՝ նա վերադառձավ Արտի Չոք` տորթն ուղարկելու:
6:48 Ստուդիա վերադառնալուց հետո, աշակերտներից մեկը ողջունում է նրան: «Դուք այստեղ եք դասն անցկացնելու՞ համար»,- բաց մեքենայի պատուհանի միջով Նանային հարցնում է մի փոքրիկ տղայի մայր, մինչ մենք փորձում ենք մեքենան կայանել,- «Նա հրաժարվում է այստեղ մնալ առանց ձեզ, մենք արդեն տուն էինք գնում»:
7:44 «Մարդկանց քանակը ինչպես կերամիկայի դասարանում, այնպես էլ ամառային դպրոցում այսօր ամենաշատն է պանդեմիայից հետո», - ուրախությամբ նշում է Նանան: Terracotta ստուդիայի դասերը դանդաղորեն վերսկսվում են, բայց Նանան չի նախատեսում փակել Արտի Չոքը: Վերջին երկու ամիսների ընթացքում նրա՝ Նուտելայից ոգեշնչված գաղափարը վերածվել է հեռանկարային բիզնեսի:
8:20 Ժամը երեկոյան 8-ին՝ աշխատանքը սկսելուց ավելի քան 12 ժամ անց Նանան ավարտել է ամեն ինչ, բացի մաքրությունից: Վաղը նա պետք է սկսի նոր տեղ պատրաստել ամառային դպրոցի համար, բայց առայժմ գրեթե պատրաստ է հանգստանալ: Ես վերջապես նկատում եմ, որ Նանան մի փոքր հոգնած է, թեև թվում էր նման բան երբեք չի լինի:
10:41 Ավելի ուշ՝ տարածքը կարգի բերելուց հետո, Նանան մի քանի ընկերների հետ ստուդիայում է՝ հանգստանալու, նոր գաղափարներ քննարկելու և տորթի նոր բաղադրատոմս փորձելու համար: Ես հարցնում եմ, թե ինչու է կանչել նրանց, երբ պարզ է, որ շատ հոգնած է: «Եթե ես չտեսնեմ իմ ընկերներին, քանի որ խառը օր եմ ունեցել, ես նրանց երբեք չեմ տեսնի», - ասում է նա:
10:51 Նանայի կյանքը վավերագրել սկսելուց մոտ 14 ժամ անց ես անջատում եմ տեսախցիկն և տուն գնում: Ես ուրախությամբ պլանավորում եմ քնել առնվազն 14 ժամ, բայց գիտեմ, որ հաջորդ օրն առավոտյան Նանան կարթնանա ժամը 6-ին՝ գնալու թարմ մրգերի շուկա և արվեստագետի ու թխվածքագործի անսպառ աշխատանքով լի օր կունենա:
ՆՎԻՐԱԲԵՐԵՔ ՉԱՅԽԱՆԱՅԻՆ
Մենք շահույթ չհետապնդող մեդիա կազմակերպություն ենք, որը լուսաբանում է թեմաներ ու առանձին խմբերի մասին պատմություններ, որոնք հաճախ անտեսվում են հիմնական լրատվամիջոցների կողմից: Մեր աշխատանքը հնարավոր չէր լինի առանց մեր համայնքի և ձեր նման ընթերցողների աջակցության: Ձեր նվիրատվությունները մեզ հնարավորություն են տալիս աջակցել լրագրողներին, ովքեր լուսաբանում են տարածաշրջանի չներկայացված պատմությունները:
նվիրաբերեք հիմա