Covid-19-ის მწვავე ფაზის დროს, ონლაინ გაცნობის აპლიკაცია Tinder-მა სიყვარულის მაძიებლებისთვის ადგილმდებარეობის შეზღუდვა მოხსნა. იზოლაციაში ყოფნის დროს ჩვენ ყველას შეგვეძლო მსოფლიო რუკაზე ნებისმიერი წერტილი მოგვენიშნა და შეყვარებულის საპოვნელად ვურტუალურად გვემოგზაურა. პაემნებმა და სექსმა Zoom-ში გადაინაცვლა. სასიყვარულო წერილები დაუსრულებელ მიმოწერად იქცა, ესეც ონლაინ აპლიკაციებში. ინტროვერტებისთვის განსაკუთრებით კომფორტული აღმოჩნდა ეს უცნაური მდგომარეობა. 

კომუნიკაციის საშუალებები და ფორმები ტექნოლოგიურმა პროგრესმა შეცვალა, თუმცა მისი აუცილებლობა ეჭვქვეშ არასოდეს დამდგარა. ძველად სასიყვარულო გზავნილებს მტრედები და ფოსტალიონები დაატარებდნენ, დღეს ამისთვის ციფრულ აპლიკაციებს ვიყენებთ და გრძნობების გამოხატვას ისევ სიტყვებით ვცდილობთ.

სანამ საზღვრები გაიხსნება და შეყვარებულებს ჩავეხუტებით, სასიყვარულო ურთიერთობებს ინტერნეტსივრცე გვინარჩუნებს.

ეს პროექტი შორ მანძილზე ყოფნის დროს, იზოლაციაში წარმოშობილ ურთიერთობაზეა, რომელიც დღემდე ვირტუალურად გრძელდება. საზღვრების გახსნას მოუთმენლად ველოდები.